V CONCURSO DE FOOTOGRAFÍA XUVENIL

Un a no máis o Concello organiza o V Concurso de Fotografía Xuvenil. Unha iniciativa que pon o acento na poboación máis nova da localidade para vinculala coa súa contorna. A herdanza e a memoria colectiva cobran especial relevancia nos obxectivos do concurso, ao convidar á xuventude a recoñecer e atopar ambos conceptos no seu contexto, nas paisaxes aresáns ou nos espazos e obxectos que forman parte das súas identidades persoais. Así, a xente nova de entre 8 a 18 anos empadroada en Ares ou que sexa alumnado do CPI As Mirandas poderá presentar as súas obras entre o próximo luns, 27 de setembro e o 18 de outubro ás 20.00h, vía correo electrónico (concursofotografia@concellodeares.com), incluíndo os formularios de participación e de identificación xa cubertos. Segundo se recolle nas bases, haberá un máximo de dúas fotografías por participante, as instantáneas non poderán ser editadas ou melloradas e terán que ser orixinais (tomadas ao longo do 2021 e non publicadas con anterioridade), entre outros requisitos. ▶️ No certame, estableceranse dúas categorías de participación, unha de 8 a 12 anos e outra de 13 a 18, e seleccionaranse 3 fotografías por cada unha delas. En ambas haberá un primeiro premio de carácter tecnolóxico (un IPad ou cámara de fotos) e un segundo e terceiro premios con lotes de libros. De igual maneira, as fotografías gañadoras pasarán a formar parte do calendario de 2022 do Concello, repartido por todo o municipio, sempre identificadas coas súas autorías. ▶️ Toda a información sobre o concurso, incluídas as bases detalladas e os formularios de participación e de identificación das fotografías, atópanse accesibles na páxina web municipal (www.concellodeares.com) A maiores, está dispoñible o número ☎️ 981 448 057 para solventar as posibles dúbidas.

 👉 DÍPTICO en pdf:

http://www.concellodeares.com/archivos/convocatorias/diptico_V_Concurso_fotografia_Xuvenil_Ares-2021.pdf?fbclid=IwAR2uO30GhcjfwWudb0yA_M2iBM_5yzSUqD0NO3EfGkpkhLcU1braie_Tz58

BENVID@S A UN NOVO CURSO (2021-22)

Xa estamos en setembro. 

Tras un verán, no que desexamos que cargarades pilas e gozarades del, comeza un novo curso escolar.

 Un mes cuxo significado transcende máis aló do fin de verán. Un mes no que predominan os novos proxectos, propósitos e ilusións; case como un inicio de ano onde tras un merecido descanso, renóvase a enerxía e sénteste capaz de todo. Sexa como sexa este curso escolar non nos vai deixar indiferentes a ninguén. 

Desde aquí moito ánimo a todos e...Feliz volta ao cole!!!

ALBARES. REVISTA ESCOLAR 2021

Albares. Revista Escolar 2021 by Yolanda Castro on Scribd

AS FOGUEIRAS DE SAN XOÁN. PROXECTO ERASMUS+ FESTIVIDADES E TRADICIÓNS

Vídeo realizado dentro do Proxecto Erasmus+ Festivities and Tradicións

 

E CHEGOU A FESTA FINAL

Despois dun ano cheo de normas e tensión, o corpo pedía baile... e houbo baile para a rapazada pequena e mediana. Bailamos, bailamos e bailamos. Que ben o pasaron!

FELIZ VERÁN!

GRADUACIÓN ALUMNADO DE 4º ESO. CPI AS MIRANDAS

Hoxe, nun  emotivo acto despedimos aos nosos  alumnos e alumnas de 4º de ESO.  Unha mestura de satisfacción polo deber cumprido por uns e por outros, e de tristeza polo que supón de despedida entrañable tras tantos anos de convivencia como membros do CPI As Mirandas. Todos e todas nós quixeramos que este acto de graduación fora máis preto e puideramos abrazarnos, pero como dixo Richard Bach, a amizade e o afecto non dependen de cousas como o espazo e o tempo e aínda que as vosas familias non puideron estar con nós  sentímolas moi preto.

Queremos pedir desculpas pola mala retransmisión en directo, a verdade é que era a primeira vez que faciamos isto virtualmente, pero como todo ten amaño, aquí vos deixamos o vídeo do acto así como os vídeos despedida.

Para rematar querémosvos desexar de corazón toda a sorte do mundo na nova etapa que comezades, e recordarvos que sempre teredes abertas as portas deste, o voso cole.

VÍDEO ACTO DE GRADUACIÓN

VÍDEO DE DESPEDIDA

 VÍDEO PROFES

       

            

              

              

               

               

               

              

PREMIOS DO IV CONCURSO ESCOLAR CANTAMOS CON LAS MANOS

 Hoxe resolvéronse os premios do IV Concurso en Lingua de Signos “Cantamos con las manos” e non podemos estar máis que contentxs polo premio acadado. Parabéns  a todos e todas os que fixéstedes posible este marabilloso traballo  e  en especial a Luisa Lombardero, a nosa intérprete de LSE polo seu esforzo de  facer partícipe a todo o cole da Lingua de Signos.

Parabéns tamén a todos os centros premiados e aos que acadaron mencións de honor así como a todos os participantes no concurso, que foron moitos.

Grazas ás compoñentes do grupo Tanxugueiras polo vídeo de felicitación, foi unha grata sorpresa.

O NOSO VÍDEO. MIDAS

CHARLA DE ANXO RAJÓ SOBRE XELA ARIAS

Hoxe tivemos a presenza no noso centro do profesor e escritor Anxo Rajó, que tivemos a sorte de ter como docente no noso cole fai tres anos. Anxo presentou o libro que escribiu sobre Xela Arias  e achegou á rapazada unha visión máis íntima da vida da autora.

Grazas Anxo pola tarde de hoxe!.

CARREIRA SOLIDARIA EN INFANTIL E PRIMARIA

Se a semana pasada  o alumnado de ESO realizaba a xa tradicional Carreira Solidaria,  esta semana tocoulle aos nenos  e nenas de Infantil e Primaria.

Por mor das restricións o alumnado de primaria baixou á praia para non xuntar aos grupos burbulla e acortar a distancia para non afogar coa mascara!  A carreira fíxose ao aire libre nun día espectacular, e fixemos moitos xogos! Pasámolo moi ben, como se pode ver no vídeo que está abaixo.

Os nenos e nenas de Infantil realizaron a súa carreira no patio do  recreo e tamén gozaron un montón!!

Grazas de novo a todos e todas pola vosa solidariedade. Para o ano máis e mellor!!!

CARREIRA  PRIMARIA

CARREIRA  INFANTIL

CARREIRA QUILÓMETROS DE SOLIDARIEDADE NO CPI AS MIRANDAS

Un ano máis celebramos a Carreira Quilómetros de Solidariedade no noso centro. Este ano, por mor das restricións debidas a pandemia,  non puidemos facer o percorrido pola nosa vila como en anos anteriores, pero iso non foi motivo para que hoxe o noso cole se volvese a transformar na festa da solidariedade. Alumnado e profes correron por todos os nenos e nenas que non teñen a mesma sorte que nós e que merecen unhas condicións mellores de vida, sobre todo neste tempo que estamos a vivir.

Grazas a todxs pola vosa solidariedade e implicación e a Paula Mayobre, a nosa madriña da carreira, polo acompañamento nestes 10 anos de Carreiras Solidarias.

Grazas tamén a Deportes MARVI pola doazón das medallas da carreira.

Para o ano, máis e mellor!!!

OS NOSOS PROGRAMAS DE RADIO. ACTIVISTAS POLO MUNDO QUE QUEREMOS

Despois de poñer en práctica todo o investigado e aprendido no obradoiro de radio no que elaboramos as nosas propias reportaxes radiofónicas, convidamos a todxs a coñecer os temas sobre os que traballamos (feminismo, medio ambiente, racismo, etc.) e tomar partido.

Desde aquí queremos dar as grazas a Javier Cristobo, Paula Mayobre, Conchi Ramil, Jon Rodríguez, Cristina Correa, Celsa Formoso  e Juan Carlos Rey.... por atender a nosa chamada para entrevistalos  e dar a súa visión desde a perspectiva do traballo que eles realizan.

A través dos seguintes podcast podedes escoitar os programas radiofónicos do alumnado de 1º e 2º de ESO.

Aquí tedes os podcast de radio dos programas.

Programa 1 realizado polo alumnado de 2º B . No programa falamos da conservación dos océanos e do ODS 14 e entrevistamos ao biólogo Javier Cristobo. Achegámonos ao colectivo LGTBI da man do activista Jon Rodríguez. Falamos de igualdade de xénero a través de fragmentos de cancións. E por último tratamos o tema do racismo nas películas e no deporte.

Programa 2 realizado polo alumnado de 1º A. Neste programa falamos de medioambiente e o efecto que as especies invasoras como o eucalipto provocan na nosa contorna e entrevistamos a Celsa Formoso, presidenta da Asociación de Amigos do Mosteiro de Santa Catalina. Tamén achegámonos  á labor que esta a facer o Padroado Concepción Arenal Casa de Acollida de mulleres maltratadas e en exclusión de Ferrol, e falamos coa súa vicepresidenta Conchi Ramil e por último entrevistan a Papá Omar e Khadija compañeiros do cole que veñen de outros países.

 

Programa 3 realizado polo alumnado de 1º C .Neste programa falamos de medioambiente e contaminación do mar e para elo contamos con Juan Carlos Rey, un pescador da nosa vila. Tamén tratamos o tema da igualdade de xénero no mundo do deporte con  Paula Mallobre, atleta aresana. Entrevistamos a  dous dos nosos compañeiros que chegaron a Ares de países tan distantes como China e Venezuela e por último analizamos a última enquisa da Axencia de Dereitos Fundamentais da UE sobre a visibilización do colectivo LGTBI. 

Programa 4 realizado polo alumnado de 1º B.  Neste programa falamos das cousas que facemos os humanos e que impiden o desenvolvemento e a reprodución das especies, do racismo no fútbol, da discriminación do colectivo LGTBI e de violencia de xénero.

Programa 5 realizado polo alumnado de 2º A.  Neste programa temos con nós a Cristina Correa profe do noso cole e cooperante que nos falará da súa experiencia como activista en Uganda, falaremos de microrracismos, de conciencia medio ambiental e  de igualdade co colectivo LGTBI como fondo.