TRABALLO POR AMBIENTES EN PRIMARIA

 O traballo por ambientes continua este curso 23/24. Son propostas estimulantes e divertidas que amplían as oportunidades de experimentación e investigación do que estamos a traballar.

 Velaí deixamos uns vídeos sobre o que estamos a traballar.

TELE MIRANDAS

 Comezamos este curso con moita choiva e borrascas!. Tanto vento fixo que ata os mapas do Brasero desapareceron…

Por suposto,todo o alumnado de primaria, decidimos axudalo investigando sobre o universo, o noso planeta e os fenómenos atmosféricos. O resultado foi o telexornal “Tele Mirandas”.

Desexamos que vos guste tanto como a nós facelo.

EXCURSIÓN Á CASA DAS CIENCIAS

 Hoxe o alumnado de 1° a 4° de primaria fomos de excursión á Casa das Ciencias. Pasámolo moi ben e gozamos dunha xornada soleada e chea de sorpresas.

Desexando volver a saír de excursión!!!

PROXECTO O NOSO CORPO. EDUCACIÓN PRIMARIA

 SORPRESA, SORPRESA!!!! Chegounos ao correo do cole un vídeo moi especial, a pediatra do centro de saúde de Ares, Lucía Rial, pídenos axuda para elaborar un libro sobre o corpo humano.

Podedes premer no seguinte vídeo e alí veredes todo o que fixemos!

PROXECTO “O CORPO HUMANO”

 Hoxe 29 de marzo con motivo do proxecto levado a termo polo alumnado de educación primaria sobre “O corpo humano”, tivemos a visita de Adrián e Iria, dietistas-nutricionistas dos centros de saúde de Pontedeume e Fene, así como de dúas enfermeiras de pediatría.

Pasamos unha xornada moi agradable facendo fincapé na importancia de manter unha dieta equilibrada e saudable para poder gozar de boa saúde e ter moita enerxía ( máis se cabe da que temos).

 

 

 

GOZAMOS CON PACO PAKOLAS

 O luns 29 de marzo visitounos no noso cole Paco Cerdeiras “Pakolas”.  Os nenos e nenas de infantil e dos cursos de 1º, 2º, 3º e 4º de primaria gozaron do seu espectáculo escoitando as súas historias, as súas cancións e movendo o esqueleto ao ritmo do seu rock and roll.

Grazas Pakolas por facernos pasar unha mañá tan alegre!

 

 

 

 

OBRADOIRO CO MULTIINSTRUMENTISTA XULIO VARELA

 Xulio Varela, o noso veciño de Ares, é un dos fundadores do famoso grupo Luar na Lubre, exercendo de multiinstrumentista especializado na percusión tradicional. Na función musical de hoxe, Xulio presentou aos ciclos de 1º e 2º de Educación Primaria tres instrumentos pouco coñecidos por todos nós. As tarrañolas e o birimbao (ou trompa galega) son instrumentos da tradición musical galega que seguen sobrevivindo grazas a persoas como o noso convidado, que buscan que o uso destes instrumentos, moi habitual hai non tantos anos, non quede no esquecemento. Mais, a tradición non é pechar as cancelas ás sonoridades procedentes doutros lugares. O terceiro instrumento que nos presentou, o bodhrán, provén da música da Irlanda, e introdúxose con éxito na música galega grazas á súa sonoridade meliflua e sedosa.

Grazas, Xulio, por darnos a coñecer un pouquiño máis do noso patrimonio inmaterial!

 

E tamén, deixando a vergoña a un lado, Josué e Yoli atrevéronse a acompañar a Xulio nunha inesperada improvisación. Para ser uns principiantes non o fixeron tan mal!. Referímonos aos acompañantes claro!.

COMEZAMOS COS OBRADOIROS DE "CONTROL OFF"

 Na mañá de hoxe, tivemos o primeiro dos obradoiros programados dentro do proxecto “Control Off”, a iniciativa para achegar á mocidade formación específica en igualdade de xénero organizada entre o Centro de Información á Muller (CIM) do Concello e o departamento  de Orientación do noso centro.

Nos obradoiros que abarcarán ata xuño, trataranse contidos básicos do desenvolvemento humano dende a coeducación, co obxectivo fundamental de previr a violencia de xénero, máis aínda dentro da contorna dixital. As temáticas tamén xirarán arredor das relación afectivas saudables a partir de metodoloxías dinámicas, empregando técnicas de debate, brainstorming… e outras ferramentas que implican ao alumnado.

 A planificación do proxecto inclúe dous tramos educativos distintos. Por unha banda, impartiranse sesións para o alumnado de Educación Secundaria Obrigatoria (ESO), mais tamén haberá varias formacións que se adaptarán ás necesidades de sexto de primaria, modulando os contidos e as metodoloxías de ensinanza. Así os nenos e nenas de primaria traballarán non tanto co foco nas relacións afectivas e bos hábitos dixitais, coma os seus compañeiros da ESO, senón en coñecer modelos positivos de convivencia, en pé de igualdade, e novos conceptos de masculinidade.

 Todos estes cursos serán impartidos por Rubén Villar, psicólogo con formación relacionada dentro do eido social, experto en psicoloxía forense pola USC e axente de Igualdade de Oportunidades para a Muller homologado pola UNESCO.

#ConcellodeAres #CIMAres #ControlOFF #ViolenciadeXenero #CPIAsMirandas