A ROSA INCANDESCENTE.

 Esta terceira feira, 25 de abril, homenaxeamos a Rosalía de Castro por partida dobre.

Primeiro coa actuación estelar de Sofía e Antonio de 2º de ESO. Nunha breve peza teatral dramatizaron os momentos máis senlleiros  da vida  de Rosalía e Manuel Murguía percorrendo o seu álbum familiar. Parabéns!

A continuación proxectamos a curtametraxe A rosa incandescente e ao rematar a súa guionista e produtora Anxos García Fonte engaiolounos cunha clase maxistral sobre Rosalía e desvelou algúns segredos sobre a súa experiencia na rodaxe da curta.

 Obrigadas Anxos!

 

 

 

 

 

 

 

ROSALÍA DE CASTRO A TRAVÉS DOS NOSOS MURAIS

 As nenas e nenos de infantil sumáronse  á conmemoración do Día de Rosalía facendo este fermoso mural inspirado  na frase de Rosalía de Castro:

 “ Galicia florida, cal ela ningunha de frores cuberta, cuberta de espuma». 

Que preciosidade!

 Tamén o alumnado de 3º e 4º da ESO, realizou na materia de Relixión un vistoso mural. Seguindo a proposta da Asociación de Escritoras e Escritores en Lingua Galega (AELG), que utiliza este ano o lema #cumpriuseaxustiza, o collage denuncia as inxustizas do mundo, plantexando a pregunta... "Que diría Rosalía"?.

A rapazada buscou na prensa imaxes de conflitos bélicos de hoxe, da inmigración no mundo, da explotación no traballo, os prezos da vivenda... e plasmouno no mural ilustrando as imaxes con palabras que nos deben facer reflexionar, e que ben poderían ser ditas por Rosalía, hoxe en día:  xustiza social, loita, lei, aldraxe, desigualdade, inxustizas, dignidade, solidariedade, conciencia, moral...

 

 

 

 

 

DESCUBRINDO A ROSALÍA DE CASTRO

 Os nenos e nenas de 1º e 2º de Educación Primaria  gozaron  do contacontos “A miña historia”, unha revisión da vida de Rosalía de Castro a través dos seus propios textos, representación que correu a cargo da compañía Trémola.

Todos e todas puideron coñecer, a través do personaxe de Andrea, as anécdotas e  a historia da nosa poetisa máis universal, muller pioneira no seu tempo e que hoxe en día cobra máis sentido ca nunca.

Esta actividade enmárcase  dentro dos actos organizados polo Concello, da man do Servizo de Normalización Lingüística da Mancomunidade, para homenaxear a Rosalía de Castro.

A verdade e que nenas e nenos o pasaron , XENIAL!.

 

 

DÍA DE ROSALÍA NO CPI AS MIRANDAS

Hoxe nun fermoso acto homenaxeamos á nosa escritora máis universal, Rosalía de Castro. O lema escollido para este 2023 foi: #cumpriuseaxustiza#. Un lema que a escritora Carme Adán fai seu a modo de pregunta e interrogante no manifesto que escribiu para este día e que alumnado e profesorado, leron no noso centro.

E como a música e a poesía están moi preto a unha da outra, cantamos e recitamos o poema de Rosalía "Adiós ríos, adiós fontes".

 

Como broche final rematamos co “Concerto a Rosalía” a cargo da “Mini big band” do noso cole. Un luxo ter a esta rapazada sempre disposta. Grazas mil.

 O himno galego puxo fin ao acto.