Un adeus emotivo: A promoción de 4º de ESO despidese do CPI As Mirandas

Hoxe vivimos un deses días que quedan gravados na nosas mentes. Celebramos a graduación do alumnado de 4º de ESO, unha promoción que hoxe remata a súa andaina polo CPI As Mirandas.

Para moitos deles e delas, este non é un adeus calquera. Foron moitos anos compartindo risas, aprendizaxes e medre persoal, xa que nos acompañan dende os seus inicios en Infantil, pasando por Primaria ata chegar a culminar a ESO. Vímolos medrar, formarse e converterse nas persoas que son hoxe.

O acto de graduación foi, sen dúbida,emotivo. Alumnado, familias, profesorado e amigos reunímonos para despedir a esta promoción. Houbo tempo para os recordos, os agradecementos, algunha que outra bágoa de nostalxia e, sobre todo, moitos sorrisos de orgullo polo camiño percorrido.

Agora comezan unha nova etapa fóra dos nosos muros, un novo horizonte cheo de retos, ilusións e grandes oportunidades.

Dende o CPI As Mirandas queremos desexarvos o mellor de corazón nesta nova viaxe que emprendedes. Non deixedes nunca de loitar polos vosos soños con enerxía e valores.

Lembrade que o colexio que vos viu medrar sempre será a vosa casa e que sempre teredes as portas abertas para regresar, contarnos os vosos éxitos ou, simplemente, lembrar vellos tempos.

Moita sorte a todos e todas!  🎓✨

 

UN FÍO VERDE PARA UN PLANETA INTERCONECTADO. DÍA MUNDIAL DO MEDIOAMBIENTE

Onte o alumnado da ESO cambiou as aulas por un escenario moi diferente: o areal e o paseo de Ares. Pero non foron de paseo, foron cunha misión clara: realizar una recollida de lixo e concienciar sobre o coidado da nosa contorna.

🧵 Remendando o mundo, fío a fío

Na escola entendemos que o noso planeta funciona como un gran tecido vivo. No ecosistema global, cada acción conta, por pequena que pareza. Por iso, nesta xornada, os nosos mozos e mozas convertéronse en auténticos "costureiros do planeta", traballando a pé de praia para remendar os danos causados polo lixo e a falta de conciencia social.

O resultado? Unha contorna máis limpa e, sobre todo, un alumnado máis comprometido co futuro do que é a súa casa: a Terra.

Unha mensaxe que recoller: Non se trata só de limpar o que outros tiran, senón de entender que o cambio empeza en cada un de nós.

Parabéns ao alumnado polo seu esforzo, o seu civismo e por demostrar que a mocidade está listísima para coidar do fío que nos sostén a todos! 👏🌱

 

UNHA VIAXE POLAS ESTRELAS SEN SAÍR DA AULA: O 1º CICLO EXPLORA O UNIVERSO CON NICO SISTO!

O alumnado de 1º ciclo tivo hoxe unha visita moi especial que nos fixo mirar cara ao ceo con ollos cheos de curiosidade. O veciño aresán Nico Sisto achegouse ao noso colexio para compartir cos nenos e nenas a súa fascinante colección fotográfica sobre o universo.

Ensinoulles a observar o ceo a simple vista, no que atoparon estrelas, cometas, planetas e constelacións. Xa profundizando un pouco máis coa axuda das súas fotografías e o telescopio chegaron a galaxias como Andrómeda.

Por suposto, tamén xurdiron curiosidades sobre o eclipse  que nos acompañará o vindeiro agosto.

Moitísimas grazas, Nico! Grazas por compartir a túa sabedoría, o teu tempo e o teu amor pola astronomía con nós. De seguro que hoxe sementaches máis dunha vocación científica nas nosas aulas. 🚀🔭