ACTIVIDADES DE NADAL.

O último día de clases antes das vacacións de Nadal foi, sen dúbida, un día cheo de alegría e diversión no noso colexio. O alumnado de ESO reuniuse para celebrar o peche do trimestre cunha serie de actividades que fixeron que todos nos sentiramos  como verdadeiros protagonistas dunha festa.

A xornada comezou coa esperada Gimkana de Nadal, onde a rapazada, organizada en grupos, lanzáronse a superar unha serie de probas divertidas e desafiantes. Desde xogos de habilidade ata enigmas.Cada actividade estaba deseñada para fomentar o traballo en equipo e, sobre todo, para gozar. A emoción sentíase no aire, e cada grupo competía con entusiasmo por ser o mellor.

 Logo da entrega de premios ao grupo gañador e como peche da xornada o alumnado preparou un mini concerto que deixou a todos os presentes cun sorriso.. Non só escoitamos, senón que tamén nos unimos á celebración cantando e bailando.

Así, coa  promesa dunhas merecidas vacacións, despedimos o trimestre

Felices festas a todos! Vémonos no novo ano con máis enerxía e ganas de seguir aprendendo xuntos

 

A COMUNIDADE EDUCATIVA DO CPI AS MIRANDAS DESÉXAVOS UN BO NADAL E PRÓSPERO 2025

VISITA NAVIDEÑA AO CENTRO DE DÍA AFAL DE ARES

Onte  quixemos visitar e felicitar  ás persoas usuarias do  Centro de Día  AFAL de Ares. A rapazada da ESO elaborou felicitacións personalizadas para cada unha delas cunha dedicatoria moi especial. Ademais agasallámolos cunha serie de xogos feitos no cole  para que pasen algúns dos seus ratiños entreténdose con eles.  Rematamos cantando panxoliñas e… a Rianxeira que tanto lles gusta!.

Tamén pasamos pola oficina de correos para enviar, como todos os anos, as postais para as persoas do Centro de Día de Maiores en Caamouco. Todos elas e eles merecen o mellor e, sobre todo, que nos lembremos do moito que lles debemos.

Desexámoslles unhas Felices Festas e un próspero Ano Novo cardadiño de saúde e saudade para todas e para  o persoal que tan ben coida delas.

GRAZAS POLA VOSA COLABORACIÓN NA OPERACIÓN QUILO DE NADAL

Un ano máis a vosa solidariedade paliará as necesidades das persoas que máis necesitan a axuda de todas e todos nós. Graciñas familias, alumnado, profesorado e comunidade en xeral pola vosa aportación, pola vosa solidariedade e polo voso apoio nesta campaña.

AMBIENTES DE APRENDIZAXE. 1º CICLO DE EP

 Os ambientes de aprendizaxe son  a cúspide final  de organizar unha serie de actividades manipulativas sobre o proxecto levado a cabo este trimestre. Dividido en diferentes ambientes: cifras e letras, os oficios, ecosistemas e arte en Ares.

ARES CON OLLOS DE NENOS E NENAS

Con este título queremos resaltar o resultado do traballo realizado polos nenos e nenas do 1° ciclo do CPI As Mirandas despois dun proceso de investigación en torno a súa vila e parroquias.

Coa súa ollada infantil pretenderon achegar a súa vila a aqueles nenos e nenas que a visiten.

Este tríptico será entregado ao concello e á oficina de  turismo despois da súa petición.

ENTREGA DOS PREMIOS DA VIII EDICIÓN DO CONCURSO DE FOTOGRAFIA XUVENIL CONCELLO DE ARES

O xoves 5 de decembro no salón de actos da Alianza Aresana,  e coa presenza da concelleira Alma Barrón así como do fotógrafo Marcos Alonso e as profesoras Belén Morón e  Yolanda Castro en representación do noso colexio, foron entregados os premios da VIII edición do Concurso de Fotografía Xuvenil Concello de Ares.

O xurado tivo a difícil tarefa de elixir entre todas as fotografías presentadas, as que ilustrarán o  calendario do Concello para este próximo ano 2025, calendario que se presentou no acto.

As fotografías de Laura, Clara, Leo, Martina, David e Mariana, gañadoras e finalistas da oitava edición do Concurso de fotografía Xuvenil Concello de Ares, locen así de ben no almanaque.

 

OPERACION QUILO DE NADAL 2024

25N. MANIFESTO NO DÍA INTERNACIONAL PARA A ELIMINACIÓN DA VIOLENCIA CONTRA AS MULLERES

Hoxe 25 de novembro, Día Internacional para a Eliminación da Violencia contra as Mulleres, desde o noso centro adherímonos a todas aquelas iniciativas que suman esforzos e solucións á erradicación da violencia de xénero. Apoiamos ás accións que tratan de concienciar ao tecido social e todas as actividades educativas baseadas na formación en valores para que a sociedade avance no camiño da igualdade, no benestar común e a convivencia que todas e todos queremos.

Alumnas e alumnos do centro leron un manifesto de compromiso para condenar a violencia e recordar que debemos seguir insistindo en campañas de prevención, informando e previndo desde todos os ámbitos da sociedade: desde a familia, cunha educación en igualdade, desde os colexios, cunha coeducación real, desde o traballo e desde os poderes públicos.

A Comunidade educativa do CPI As Mirandas, dicimos NON á violencia de xénero!

SESIÓN DE CONTACONTOS PARA CONMEMORAR O DÍA INTERNACIONAL DOS DEREITOS DA INFANCIA

O 20 de novembro celebramos o Día Internacional dos Dereitos da Infancia, e para conmemorar esta data tan importante os alumnos e alumnas da 4º e 3º de ESO prepararon unha actividade de contacontos para os nenos e nenas de infantil e primaria.

A través do conto “Na procura dun mundo marabilloso”, lles narraron a historia dun grupiño de nenos e nenas liderados por Liberdade que se embarcan nunha viaxe por un camiño longo e verde na procura dun mundo mais humano e mellor. 

As rapazas e rapaces da ESO  explicaron  aos máis pequenos/as o porqué da celebración desta data tan importante e amosaronlles a importancia  de respectar en todo o mundo os  Dereitos dos Nenos e as Nenas. Tamén reflexionaron entre todos sobre os distintos dereitos, incidindo tamén en que non só teñen dereitos senón que tamén teñen deberes que cumprir para vivir nunha sociedade xusta, plural, solidaria e igualitaria.

Finalizaron  cun simpático xogo de pasapalabra rematando a sesión cun pequeno agasallo realizado polo alumnado da ESO para todos os asistentes.

Na Procura Dun Mundo Maravi... by yolick20003194

20 NOVEMBRO. DÍA INTERNACIONAL DOS DEREITOS DA INFANCIA

 No Día Internacional dos Dereitos da Infancia, é importante lembrar e reivindicar os dereitos que cada neno e nena teñen polo simple feito de ser nenos. Debemos asegurarnos de que teñan unha infancia feliz, segura e chea de oportunidades para crecer e desenvolverse plenamente.

Neste día, queremos lembrar que cada neno é especial e único, e merece ser tratado con dignidade e respecto. É o deber de toda a sociedade asegurarnos de que se cumpran  e de traballar xuntos para construír un mundo máis xusto e equitativo para todos.

Aquí podedes escoitar o podcast que o alumnado de 1º de ESO realizou para conmemorar esta data e reivindicar o seu cumprimento.

yolick · PODCAST DEREITOS DOS NENOS 2024

XORNADA LÚDICO CULTURAL DE CONVIVENCIA. 2º ESO

O luns 18 de novembro, o alumnado de 2º de ESO tivo a oportunidade de gozar dunha xornada de convivencia en Redes, unha paraxe natural chea de beleza que nos ofreceu un respiro do axetreo cotián. A aventura comezou cunha camiñata enérxica cara a Redes mentres nos adentrabamos na natureza.

Unha vez chegamos ao noso destino, a Agrupación Instructiva de Caamouco, organizámonos en dúas quendas. Mentres un grupo realizaba xogos cooperativos o outro participaba nun emocionante escape room no que a tensión e a emoción apoderáronse do grupo mentres trataban de resolver os enigmas e atopar a saída.

Foi unha actividade que fomentou o traballo en equipo e a colaboración, ademais de divertirnos moitísimo.

Despois da adrenalina do escape room e os xogos cooperativos chegou o momento de repoñer forzas. Cada un de nós levamos a nosa propia comida, e sentámonos todos xuntos para gozar dun magnífico xantar ao aire libre.

Para finalizar a xornada, decidimos regresar pola praia. Camiñamos ao longo da beira do mar gozando da brisa mariña, un peche perfecto para un día repleto de actividades.

En resumo, esta saída a Redes foi unha experiencia enriquecedora que nos permitiu gozar da natureza e fomentar a cooperación entre todos e todas.

Queremos dar as grazas aos monitores Brais e Juani e á GUAGUA pola organización da actividade e á agrupación Instructiva de Caamouco por prestarnos as súas instalacións para a realización das mesmas.

Aquí tendes un pequeno vídeo resumo da xornada.

PENSAR O TURISMO DESDE A ÓPTICA DA INFANCIA

🔷O xoves 14 de novembro unha delegación de 70 nenos e nenas do 1º ciclo de primaria visitaron as instalacións do Concello para coñecelo, aprender como se desenvolve a institución no día a día e falar coa concelleira de Turismo, Lucía Blanco, que os atendeu e lles fixo unha petición particular.

 🔷 Blanco convidou aos pequenos a resolver unha cuestión: que espazos de Ares son importantes para eles? Como podemos contarlle a un amigo que nunca estivo na vila o seu valor, os lugares que ten que visitar? Esas dúas preguntas son as que traballarán na aula co seu profesorado, de cara a crear un tríptico no que se incorporen as súas ideas, dando unha visión do municipio dende a óptica da infancia. Os parques, as praias, a Praza da Constitución co seu palco… son algúns dos espazos que xa resoaron na visita da rapazada.

 🔷 A expedición do CPI As Mirandas levounos até o salón de plenos da casa consistorial, onde a edila de Turismo explicoulles que decisións se toman neste epicentro de representación da vila de Ares e que fai cada concellaría coa súa área de traballo. 

 🔷 Houbo tempo tamén para formular dúbidas dende os máis pequenos, como o porqué dos nomes das rúas, continuando co proxecto que xa desenvolveron previamente de percorrer o casco urbano de Ares para identificar certas vías ou lugares de interese, aproveitando o rueiro municipal que lles entregaron na Oficina de Información Turística do Concello.

 🔷 Foi no propio salón de plenos onde Blanco lles achegou a súa petición para que entre todos poidan elaborar os trípticos e presentarlle ese abano de ideas sobre os sitios con maior interese turístico da vila. Un xeito de fomentar a participación dos pequenos e pequenas en Ares!

SEGUNDA CHARLA DIVULGATIVA NO MARCO DO PROXECTO ‘O OURIZO DE MAR, UN TESOURO POSTO EN VALOR ONDE O ATLÁNTICO GOZA’

➡️ O venres  15 de novembro o alumnado de sexto de primaria do CPI As Mirandas acudiu ao "Centro Cultural Outeiro" de Chanteiro para achegarse de novo, como xa se fixera ao peche do mes pasado, ao produto do litoral da nosa contorna a través dunha charla divulgativa con profesionais do eido mariñeiro.

➡️ Os representantes da Confraría de Pescadores de Ares amosáronlles os instrumentos e o proceso de extracción do ourizo de mar, mais tamén aproveitaron para que rapaces e rapazas puideran ver de preto outro dos manxares da ría: os centolos, que veñen de abrir a súa veda de captura na comarca. Tamén aprenderon, entre outros contidos, como é o proceso de reprodución e alimentación destes dous produtos, sendo testemuñas da enorme biodiversidade do Océano Atlántico.

➡️ Estas sesións de charlas divulgativas inscríbense dentro do proxecto do Concello de Ares ‘O ourizo de mar, un tesouro posto en valor onde o Atlántico goza’, que suma ás charlas escolares outras iniciativas como a preparación e tratamento do propio ourizo, con showcookings e degustacións, ou a exaltación popular deste produto na contorna de Chanteiro, sempre co obxectivo de dalo a coñecer e poñelo en valor.

🔷 O proxecto ‘O ourizo de mar, un tesouro posto en valor onde o Atlántico goza’, conta co apoio económico da Consellería do Mar da Xunta de Galicia, o GALP GOLFO Artabro NORTE e fondos da Unión Europea 🤝.

Magosto 2024

 Hoxe San Martiño foi o día elexido para celebrar entre todos o Magosto. Este curso acercámonos ao parque para desfrutar de xogos e castañas, ahí vai unha mostra.

O ALUMNADO DE 2º DE ESO DO CPI AS MIRANDAS PREMIADO NO IV CONCURSO CIBERSEGURIDADE NO COLE!

 

Un equipo de alumnos dos centros de secundaria CPI As Mirandas de Ares, IES Valle-Inclán de Pontevedra e IES Rosais II de Vigo resultaron gañadores da IV Edición de Ciberseguridade no cole!, mentres que na categoría de primaria gañaron os colexios CPR San Pío X de Ourense, CEIP Cabanas (Salcedo, Pontevedra) e Sek Atlántico International School de Poio.

A final e a entrega de premios celebráronse este xoves en Santiago coa presenza do presidente da Xunta, Alfonso Rueda, e a participación do director da Axencia para a Modernización Tecnolóxica de Galicia -AMTEGA-, Julián Cerviño, e o director do Territorio Norte de Telefónica, Manuel Ángel Alonso.

O obxectivo  do concurso   é fomentar a concienciación en materia de ciberseguridade no ámbito escolar, e facilitar que os escolares adquiran os coñecementos e as ferramentas necesarias para facer fronte aos riscos que entraña o uso dos medios dixitais.

No transcurso do acto destacouse o crecemento sostido da participación, edición tras edición, tanto de colexios como de alumnos. Este ano, na fase de clasificación en liña, que se celebrou o pasado 15 de outubro, participaron uns 7.500 alumnos de toda Galicia, pertencentes a 270 clases de 121 colexios.

Parabéns ao alumnado e profes de 2º de ESO!

O ALUMNADO DO CPI AS MIRANDAS ADÉNTRASE NAS PARTICULARIDADES DO OURIZO DE MAR

 

O ALUMNADO DO CPI AS MIRANDAS ADÉNTRASE NAS PARTICULARIDADES DO OURIZO DE MAR

➡️ Da man da Confraría de Pescadores de Barallobre, mozos e mozas de sexto de primaria do CPI As Mirandas descubriron onte no Centro Cultural Outeiro de Chanteiro a riqueza mariña do ourizo de mar, un produto que amosa a gran biodiversidade do Océano Atlántico.

➡️ O Concello de Ares vén de impulsar esta charla divulgativa inscrita dentro do proxecto ‘O ourizo de mar, un tesouro posto en valor onde o Atlántico goza’, que inclúe dende estas sesións a escolares impartidas por profesionais do mundo mariñeiro como outras iniciativas de preparación e tratamento do propio ourizo, con showcookings e degustacións, ou a exaltación popular deste produto, sempre co obxectivo de dalo a coñecer e contextualizar o seu valor.

➡️ Nesta charla no Centro cultural outeiro, o alumnado aprendeu como é o proceso de extracción do ourizo, amais de ver in situ varios exemplares de diferente tamaño, recoñecendo así a súa m morfoloxía e as partes que se preparan despois para degustalas, como acontece na celebración de exaltación anual do Ourizo que se organiza en Chanteiro.

➡️  Desta maneira, non só se dá a coñecer o ourizo de mar no eido territorial do Golfo Ártabro, senón que se promociona a cultura mariñeira e a actividade pesqueira de Ares, fomentando os produtos da zona e o consumo local.

➡️ Proximamente, o Concello organizará unha segunda charla divulgativa no marco desta iniciativa para os e as escolares o vindeiro 🗓️ 15 de novembro e repartirá entre a veciñanza en xeral un díptico con información sobre o ourizo de mar.

🔷 O proxecto ‘O ourizo de mar, un tesouro posto en valor onde o Atlántico goza’, conta co apoio económico da Consellería do Mar da Xunta de Galicia, o GALP GOLFO Artabro NORTE e fondos da Unión Europea.

#ConcellodeAres #ConcellariadeCultura Ares #GALPGolfoArtabroNorte #ConselleriadoMar #XuntadeGalicia #OurizodeMarAres #CentroCulturalOuteiroChanteiro

https://concellodeares.gal/estudantado-do-cpi-as.../

SAMAÍN NO CPI AS MIRANDAS

 Un ano máis, chega a primeira festa do curso, unha festa que nos atrapa a todos polo misterio e a fantasía que a acompañan:  O Samaín!!! . Esta festividade marca o final do verán e o inicio do inverno.

Este ano,  o CPI As Mirandas transformouse nun verdadeiro labirinto de pesadelos e fantasía, con motivo do concurso de decoración de portas terroríficas e das sorprendentes decoracións que ornamentaron cada recuncho do centro e que non deixaron indiferente a ninguén exhibindo a súa creatividade.  Non faltaron as cabazas, os debuxos terroríficos,  os arrepiantes sons  gravados polo alumnado de ESO  e os disfraces para ambientar a celebración neste espírito festivo.  Unha xornada repleta de maxia, risas e un toque de medo.

Aproveitamos tamén esta ocasión para entregar os diplomas do concurso de "Decoración de portas de Samaín".

 

GUÍA USO SEGURO INTERNET E REDES SOCIAIS. XUNTA DE GALICIA

 

Guia Uso Seguro de Internet... by veracruces

DÍA DAS BIBLIOTECAS 2024

Hoxe é o Día das Bibliotecas, de todas as bibliotecas; tamén das bibliotecas escolares de Galicia.

Celebrémolo!!!

Parabéns á biblioteca Municipal de Ares polo Séptimo Premio Nacional María Moliner.

Lembrade que hoxe as 19:00h  haberá unha sesión de  contacontos coa escritora Ana Meilan.

 

https://edu.xunta.gal/biblioteca/blog/?q=node/1800

#DíadasBibliotecas #porunfuturosostible #bescolaresgal #bescolaresgalabertas

CONCURSO DECORACIÓN DE PORTAS. SAMAÍN

 

CONVOCATORIA DO CONCURSO DE IMAXES GRÁFICAS E PEZAS AUDIOVISUAIS, CON MOTIVO DO 25 DE NOVEMBRO “DÍA INTERNACIONAL CONTRA A VIOLENCIA DE XÉNERO”

 

Con motivo da celebración do 25 de novembro, Día Internacional contra a Violencia de Xénero, a Dirección Xeral de Loita contra a Violencia de Xénero e a Dirección Xeral de Ordenación e Innovación Educativa convocan un Concurso de imaxes gráficas e pezas audiovisuais.

👉O obxecto do concurso é a realización de traballos, consistentes en imaxes gráficas e pezas audiovisuais, coa finalidade de promover a reflexión sobre a loita contra a violencia de xénero dentro dos centros educativos de Galicia, a través dunha acción que fomente a participación cidadá no rexeitamento público e frontal contra a violencia de xénero e sensibilizar sobre a importancia de valores como o respecto e a igualdade entre mulleres e homes.

👉Tema: Reflexión contra a violencia de xénero.

👉Destinatarios: Poderá participar no concurso calquera centro educativo de ensino non universitario que imparta ensinanzas de primaria, ESO, bacharelato, formación profesional e ensinanzas especiais de artes plásticas e deseño da Comunidade Autónoma de Galicia.

👉Participación: Os traballos poderán realizarse individualmente ou en grupo a través de equipos guiados por 1 docente e constituídos por un máximo de 8 alumnos e alumnas; procurarase a representación equilibrada entre o alumnado.

👉Categorías:

• 1ª Categoría: alumnado de 5º e 6º de educación primaria, de 1º e 2º de educación secundaria obrigatoria (ESO) e de educación especial.
• 2ª Categoría: alumnado de 3º e 4º de educación secundaria obrigatoria (ESO), de 1º e 2º de bacharelato (BAC), de FP básica, de ciclos de grao medio e de ciclos de grao superior.
• 3ª Categoría: alumnado das ensinanzas especiais de artes plásticas e deseño.

👉Modalidades de participación:

• Modalidade "Imaxe gráfica": consiste na realización dun traballo gráfico (cartel, cómic, ilustración, debuxo...).
• Modalidade "Peza audiovisual": consiste na realización dun traballo audiovisual (curtas, viodeoclips, performances, flashmob, danza, videopoemas, textos recitados...).

👉Prazo de presentación dos traballos: ata o día 8 de novembro de 2024, ás 15:00 horas.

👉Indicacións para para os envíos:

• enderezo postal: Dirección Xeral de Loita contra a Violencia de Xénero, edificio administrativo San Lázaro s/n - 15781 Santiago de Compostela
• enderezo electrónico:premios25n.igualdade@gmail.com

Pódense consultar as bases completas no documento anexo. 

👉Convocatoria do concurso

XA ESTÁ AQUÍ A VIII EDICIÓN DO CONCURSO DE FOTOGRAFÍA XUVENIL CONCELLO DE ARES

 Xa temos aquí a VIII Edición do Concurso de Fotografía Xuvenil que o Concello de Ares en colaboración tamén co noso cole organiza cada ano. Como sabedes, deste concurso sairán as  fotografías que se incorporarán ao calendario municipal do ano 2025 e que se distribúe entre toda a veciñanza e comarca.

A que che gustaría que a túa fotografía formase parte do calendario deste ano?. Pois xa sabes  o que tes que facer, colle o teu móbil ou cámara de fotos e anímate a fotografiar espazos, lugares, obxectos, actos ou situacións da nosa contorna que consideres parte da túa, da nosa identidade.

ANIMÁDEVOS A PARTICIPAR!!!!!!

BASES

O ROSA É MÁIS CUNHA COR. CADENA HUMANA SOLIDARIA CONTRA O CANCRO

 A vila de Ares realizará unha cadea humana contra o cancro con motivo do Día Mundial do Cancro de Mama, baixo o lema «O rosa é máis  cunha cor».

A data será o  domingo 20 de outubro ás 13:00 horas ao longo do Paseo Marítimo.

Con este acto, a Xunta local de Ares da Asociación Española de Loita contra o Cancro (AECC), quere  expresar o apoio ás persoas afectadas por esta enfermidade e as súas familias. Ademais, búscase concienciar á sociedade sobre a importancia da investigación, a prevención e o diagnóstico temperán.

Desde a organización, anímannos  a todos a unirse e participar neste evento solidario vestindo algunha peza de cor rosa.

 

DOAZÓN DE IMPRESORA 3D AO NOSO CENTRO

 Desde aquí queremos dar as grazas  a Rodolfo Ogando pola doazón dunha impresora  3D para o noso colexio. De seguro que faremos un bo uso dela.

Mil grazass!

Este curso as bibliotecas escolares de Galicia saen A ESCENA!

BENVIDXS. CURSO 24-25

 

ENTREGADA A RECADACIÓN DA CARREIRA SOLIDARIA A FAVOR DE SAVE THE CHILDREN

REVISTA ESCOLAR ALBARES. CURSO 23-24

ENTREGA DE PREMIOS FIN CURSO. CPI AS MIRANDAS

ACTO DE GRADUACIÓN 4º ESO. CPI AS MIRANDAS

 Onte, venres 21 de xuño, celebramos a graduación do alumnado de 4º ESO. Un acto cargado de emoción en compañía das familias, profesorado, compañeiros/as e representantes do Concello.

Despois de varias semanas de traballo intenso, exames, estrés...chegou o momento máis desexado: o final de curso. E para estas rapazas e rapaces que pasaron a meirande partes das súas vidas compartindo aula, compañeiros e profesores, esta foi a derradeira xornada no CPI As Mirandas.

Desexámosvos de corazón toda a sorte do mundo na nova etapa que comezades, e recordarvos que sempre teredes abertas as portas deste, o voso cole.

Con cariño, A Comunidade Educativa do CPI As Mirandas

VIDEO RECORDO DO PASO POLO NOSO COLE

VÍDEO ACTO DE GRADUACIÓN

GALERÍA DE FOTOS

XIV CARREIRA QUILÓMETROS DE SOLIDARIEDADE

 Un ano máis, e xa van catorce, o noso colexio como Centro Embaixador de Save  The Children   organizou a XIV Carreira Quilómetros de Solidariedade.

Desde o noso centro agradecemos a todo o alumnado e profesorado a participación na carreira solidaria e por suposto ás familias por patrocinar coas súas aportacións esta causa, ao concello, á policía local de Ares e a protección civil.

Calzar as nosas zapatillas e correr por unha causa solidaria merece a pena, porque moita xente pequena, en lugares pequenos, facendo cousas pequenas pode cambiar a vida das nenas e nenos máis vulnerables.

VÍDEO DE DESPEDIDA REALIZADO POLA RAPAZADA DE 4º ESO

Hoxe Día Nacional das Linguas de Signos Españolas quero compartir o vídeo de despedida que realizaron as rapazas e rapaces de 4º da ESO, que este ano se graduan. Acórdome cando xa en primaria, da man de Luisa a nosa intérprete de LSE, comezaron a interpretar e a signar eses marabillosos videoclips e é un orgullo dicir que hoxe voan sós. Proba diso é este precioso vídeo que realizaron.

 Sodes o máximo. O mundo é voso e estades preparados para conguistarlo.

 

MELLOR SEN LIXO.

 Os rapaces e rapazas de 4º  de ESO  realizaron unha recollida de lixo na contorna do paseo marítimo e na Praia de Ares, un xesto contra o Cambio Climático que debería facernos reflexionar  sobre  como debemos xestionar os nosos residuos adecuadamente.

Esta saída non só foi unha actividade educativa, senón tamén un recordatorio da importancia de coidar a nosa contorna e difundir a mensaxe entre a sociedade para que entre todos consigamos crear un mundo mellor e máis sostible.

Por uns océanos e praias libres de lixo

#mellorSenLixo

VISITA Á HORTA DE LUÍS

O alumnado de 1° e 2° visitou a horta de Luís, un veciño de Ares que se ofreceu a contarnos os seus mellores segredos agrícolas. Alí puideron observar, aspectos coma o sistema rudimentario de rego, compost e diferentes tipos de plantación. Quedamos convidados para volver! Todo un pracer.

 

EXPOSICIÓN COMEDY WILDLIFE

 O alumnado de 1° e 2° de primaria, visitou no día de hoxe, continuando co noso proxecto Natureza ,  a exposición Comedy Wildlife, no cal se mostra a cara máis divertida da vida salvaxe.  Todo isto a través das fotografías seleccionadas no recoñecido premio Comedy Wildlife photo dos anos 2015 a 2022.

Bulide a visitala, a nos sacounos máis dun sorriso.

Ademais aproveitamos para facer un taller de xabón e axudar ao coidado do medioambiente a través dun consumo máis responsable e reducir o uso dos plásticos.

 

QUEREMOS SER ARTISTAS

Este curso o alumnado de 5º de primaria tivo a oportunidade de representar unha obra no teatro Jofre. Si, no teatro Jofre!

A obra que escolleron nesta ocasión é "As laranxas máis laranxas de tódalas laranxas". Neste traballo participou toda a clase e contaron ademais coa colaboración dos pais e as nais. Gozaron moito traballando en equipo.