Durante a videoconferencia, Javier ofreceunos
unha completa visita guiada de proa a popa a través do impresionante barco no
que se atopa. Explicounos como funciona o ROV Subastian, un vehículo operado
remotamente que ten a misión de capturar mostras e obter imaxes de alta
resolución en montes submarinos, fontes hidrotermais e a fosa profunda das
illas Sandwich. Que marabilla de tecnoloxía!
Tamén puidemos ver desde onde manipulan o ROV, as dependencias do barco (ponte de mando,
laboratorios, heliporto, camarotes, salas de reunións…), un barco espectacular
para unha misión espectacular.
Os alumnos e alumnas estaban entusiasmados e
non perderon a oportunidade de facerlle preguntas sobre a misión científica,as súas campañas
antárticas e o seu traballo diario. A curiosidade foi palpable, e ao final, non
puideron resistir preguntarlle sobre o seu paso como remeiro no club de
remo de Ares. Como moitos sabedes, hai un nutrido grupo de estudantes que están
vinculados ao club, e foi un momento especial ver como Javier, cun sorriso,
contestou a cada unha das preguntas, facendo un guiño á nosa vila e vestindo
con orgullo a camiseta do club de remo de Ares.
Esperamos que, ao regreso da expedición, se o seu traballo o permite, acepte a nosa invitación e nos faga unha visita ao noso colexio. Sería unha honra recibilo e escoitar máis sobre as súas investigacións e o seu traballo.
Grazas, Javier, polo teu tempo, o teu
compromiso coa divulgación científica e por levar sempre a Ares alén das nosas fronteiras. Esperámoste cos brazos abertos!
Aquí
podedes ver un resumo da videoconferencia.
No hay comentarios:
Publicar un comentario