O luns 25 de maio, o CPI As Mirandas volveu vestir as súas mellores galas para celebrar a VIII Feira de Proxectos, unha cita que este ano levou por título “Tecendo Ideas”. E nunca mellor dito, xa que a xornada converteuse no escaparate perfecto para amosar o gran tapiz de coñecementos que o alumnado e o profesorado foron tecendo, fío a fío, ao longo de todo o curso escolar.
Unha viaxe interdisciplinar e sen barreiras
A gran virtude da feira
deste ano foi a interdisciplinariedade. Lonxe de entender as materias
como compartimentos estancos, os proxectos presentáronse conectados por un fío
condutor que unía os saberes igual que se fose a vida mesma.
Quen visitou a feira puido
viaxar no tempo, no espazo e na nosa propia identidade a través dos diferentes stands:
- Viaxes no tempo: Desde a maxia da Prehistoria e os misterios
da Idade Media, ata a grandiosidade do Imperio Romano.
- As nosas raíces e tradicións: Unha parada moi especial foi a protagonizada
polo alumnado de 3º ciclo de Primaria, cun proxecto dedicado ás
festas máis populares e emblemáticas da vila de Ares. A través do seu
traballo puido gozarse da cor e historia do Ares Indiano, a maxia e
arte das Alfombras Florais, e a tradición mariñeira coa Festa da
Cabría en Redes.
- Futuro e Innovación: As novas tecnoloxías tiveron un papel
protagonista grazas ao fabuloso traballo desenvolvido polo equipo de Polos
Creativos.
- Máis alá das nubes: Unha viaxe fascinante cara ao espazo e o
universo que nos circunda.
- Reciclaxe na aula de música: O alumnado de Música da ESO demostrou que a arte
non ten límites ao construír instrumentos con materiais de refugallo. Ver a
ledicia dos máis pequenos do cole mentres os tocaban foi, sen dúbida, o mellor
premio a este gran traballo en equipo.
"Unha auténtica
explosión de saberes conectados, onde a teoría se transformou en práctica e a
aprendizaxe en pura experiencia."
O motor do éxito: Toda a comunidade unida
O éxito desta oitava edición
non tería sido posible sen a implicación absoluta de toda a comunidade
educativa e do tecido social do noso concello. Desde o centro queremos
transmitir o noso máis sincero parabén e agradecemento a:
- O profesorado de Infantil, Primaria e Secundaria, pola súa
guía e motivación.
- Os nenos, nenas e rapazada de todas as idades, que foron os verdadeiros
protagonistas e demostraron un entusiasmo e un nivel de implicación
destacables.
- As familias, que un ano máis nos acompañaron e animaron.
Ritmo, emoción, deporte e compromiso social
A feira tamén reservou un
espazo moi especial para a saúde, a solidariedade e o deporte. Por unha banda,
queremos facer unha mención de gratitude moi especial ao Club de Remo de
Ares, por estar presente ano tras ano nesta cita, axudándonos a tecer o
deporte como un fío de vida fundamental para o noso alumnado.
Por outra banda, o
agradecemento esténdese a Bárbara e Nando, os profes de Educación Física
que, ano tras ano, preparan con tanto agarimo o baile do colexio. Nesta
ocasión, os nenos e nenas abraiaron a todos cunha coreografía preciosa que
agochaba un lema solidario moi importante: “DOA SANGUE”.
Moitas grazas a todos e a
todas por facer posible este día
tan especial e por compartir connosco o orgullo de ver medrar as nosas ideas.
Para que poidades revivir os mellores momentos da xornada ou ver un anaquiño de todo o que alí se viviu, deixámosvos a continuación uns vídeos cunha pequena mostra do que deu de si esta VIII Feira de Proxectos.
No hay comentarios:
Publicar un comentario