O pasado venres 13 de febreiro, o noso centro encheuse de cor, ritmo e moita creatividade para celebrar unha das datas máis agardadas do calendario: o Entroido 2026. Baixo o suxestivo lema "Tecendo o Entroido: Retallos de festa e identidade", a xornada converteuse nunha homenaxe á nosa historia a través do que vestimos e do que escoitamos.
Un desfile contra o temporal
Aínda que o tempo non quixo unirse á festa e as borrascas obrigáronnos a buscar refuxio, a choiva non puido coa nosa ilusión. O pavillón do colexio transformouse nunha improvisada pero espectacular pasarela onde o noso alumnado puido lucir o traballo de semanas.
A temática deste ano estivo vencellada ao proxecto de centro “Sen perder o fío, tecendo ideas”, unha proposta que nos permitiu explorar como a moda e a música son o reflexo de quen somos.
Unha liña do tempo chea de ritmo
O desfile foi unha auténtica viaxe histórica. Os asistentes puideron gozar dunha liña do tempo visual e sonora que percorreu diversas etapas da humanidade:
- As orixes: Desde a pegada salvaxe da Prehistoria ata a elegancia clásica dos Romanos.
- O século XX: os indianos, a distinción dos anos 30 e a rebeldía pacífica do movemento Hippy.
- A cultura urbana: O ritmo do Rap e a estética desenfadada da moda skater.
Esta pasarela non foi só diversión; serviu para recordarnos a importancia da roupa como fío condutor da nosa identidade ao longo dos séculos.
Un final con sabor a tradición
As familias non quixeron perderse a cita e acompañaron aos rapaces e rapazas, gozando de cada disfraz e coreografía. Pero un Entroido non está completo sen o sentido do gusto. Para pechar esta xornada inesquecible, o alumnado desfrutou dunha merenda tradicional onde non faltaron os clásicos desta época: orellas, freixós, rosquillas e torrixas.
A pesar das borrascas, no CPI As Mirandas quedounos claro que, cando hai boas ideas e ganas de festa, o fío da ledicia nunca se rompe.
Grazas a todos e todas por facelo posible!
No hay comentarios:
Publicar un comentario