FALLADOS OS PREMIOS DA VIII EDICIÓN DO CONCURSO DE PORTADA DE LIBROS

VII FEIRA DE PROXECTOS DO CPI AS MIRANDAS

 Estamos moi satisfeitos coa xornada do pasado luns 9 de xuño, na que celebramos, como cada ano, a nosa tradicional Feira de Proxectos. Este evento é unha oportunidade fantástica para amosar o esforzo e o traballo en equipo que o alumnado do CPI As Mirandas realizou ao longo deste curso. A VII Feira de Proxectos é o resultado do compromiso e da dedicación de toda a comunidade educativa, e estamos moi orgullosos do acadado.

Queremos felicitar a todos os membros da comunidade: aos profes de infantil, primaria e secundaria, aos nenos, nenas  e rapazada de todas as idades, e a todas as familias que nos acompañaron. Cada un deles aportou o seu gran de area, traballando con ilusión e colaboración para que cada stand e proxecto fose un éxito. O nivel de implicación e o entusiasmo que se viu durante toda a xornada foron realmente destacables.

Para que poidades ver un pouco do que foi a feira, deixámosvos uns vídeos cunha pequena mostra da xornada. Moitas grazas a toda a comunidade educativa e, por suposto, ás familias e persoas que se achegaron ata o colexio para compartir este momento especial con nós.

👉 Time lapse. A Feira en 3 minutos

👉Baile 

👉Resumo da feira

5 XUÑO. DÍA MUNDIAL DO MEDIOAMBIENTE

 Hoxe, 5 de xuño, Día Mundial do Medioambiente, a pesar da choiva e as dificultades do tempo, un grupo de rapaces e rapazas de 3º da ESO demostraron que o compromiso co noso planeta é máis forte que calquera adversidade. Con moita ilusión, realizaron unha recollida de lixo na contorna máis próxima, un acto que é un verdadeiro exemplo de responsabilidade e conciencia ambiental.

Este pequeno pero significativo xesto contra o Cambio Climático debería facernos reflexionar a todos sobre a importancia de xestionar os nosos residuos de xeito adecuado. Cada acción conta, e cada un de nós pode contribuír a crear un mundo máis sostible e respectuoso co medioambiente.

Queremos lembrar máis que nunca a importancia de coidar o noso planeta e de difundir esta mensaxe entre toda a sociedade. Entre todos, podemos facer a diferenza e construír un futuro mellor para as próximas xeracións.

QUÉROTE +. O ALUMNADO DE 3º DE ESO COMPARTE OS SEUS COÑECEMENTOS A TRAVÉS DUN PODCAST

Este curso, o alumnado de 3º de ESO participou activamente en diversos obradoiros do Programa Querote+, centrados en temáticas moi importantes para o seu benestar. Durante estas sesións, os estudantes abordaron temas como a sexualidade, o benestar emocional, a promoción do bo trato, a prevención das ITS e os embarazos non planificados, entre outros aspectos fundamentais para a súa formación integral. 

 Ao rematar os obradoiros, os rapaces e rapazas decidiron crear un podcast no que exercer como transmisores e transmisoras do que aprenderon. Este proxecto permitiulles non só consolidar os seus coñecementos, senón tamén achegar esa información ao resto do alumnado do centro. Así, os seus compañeiros e compañeiras de diferentes cursos puideron acceder a información útil e actualizada, fomentando un ambiente de respecto, confianza e apoio mutuo. Este intercambio de coñecemento e experiencias contribúe a fortalecer as relacións entre os diferentes cursos, promovendo unha convivencia máis positiva e enriquecedora para toda a comunidade educativa. 

A continuación podedes escoitar o podcast:

 

tesmoitalingua galego · PODCAS. QUÉROTE+

LETRAS GALEGAS 2025: AS CANTAREIRAS E A POESÍA POPULAR ORAL

Este ano o día das Letras Galegas está protagonizado polas cantareiras e as cantigas tradicionais galegas que preservaron a lingua galega por medio das súas cantigas, e crearon unha poesía popular transmitida de nais a fillas, de avoas a netas, e entre a veciñanza toda.

Para as representaren no Día das Letras Galegas foron escollidas Adolfina e Rosa Casás (Cerceda), Eva Castiñeiras (Muxía), e Prudencia, Asunción Garrido e Manuela Lema, tres das integrantes das Pandeireteiras de Mens (Malpica de Bergantiños).

Hoxe coma homenaxe a todas elas imos interpretar e bailar a canción “O salón das cereixas” de Xabier Díaz e Adufeiras de Salitre. Imos aló!

MANUEL RAMIL NO NOSO COLE

 Manuel Ramil: A paixón pola música e a loita polos nosos soños

Hoxe o noso centro tivo o pracer de recibir a un invitado moi especial: o músico, compositor e produtor aresán Manuel Ramil. Esta visita foi posible grazas aos departamentos de linguas, que convidaron a Manu a compartir a súa experiencia e traxectoria como músico co alumnado de 2º da ESO, dentro dun proxecto que están a facer.

Durante a charla, Manuel Ramil deixou unha mensaxe moi importante para todos nós: na vida, sempre debemos traballar para acadar os nosos soños. Animounos a dedicarnos a facer o que nos gusta, porque cando o fas, a sensación de que non estás a traballar realmente é moi grande. Ter unha vocación e poder dedicarse a ela é unha parte fundamental da felicidade na vida.

Manu contou a súa propia historia, desde os seus comezos de neno, cando comezou a tomar clases de solfeo e piano. Aínda que se licenciou en ciencias políticas en Santiago de Compostela, a súa verdadeira paixón era a música. Durante a súa etapa de estudante, formou parte da banda Torquemada e comezou a tocar en bares e pubs, aínda que o seu pai non estaba moi dacordo con que intentara dedicarse a iso. Pero Manu non se rendeu e, pouco a pouco, pasou de tocar en pequenos festivais a cumprir o seu soño de tocar con bandas profesionais en países como España, México, Colombia e América.

WarCry, Mägo de Oz, Avalanch, Delalma…son algunhas das bandas nas que Manu Ramil desenvolveu e desenvolve a súa faceta como músico, compositor e produtor. Ademais, creou un proxecto de cancións personalizadas chamado "Cancións de Colores para a Guagua" coa que tamén colabora.  Xa vedes que traxectoria máis apaixonante!

Manu tamén nos convidou a visitar o seu estudio de gravación e incluso a facer algunha cousíña alí, o que nos pareceu unha oportunidade incrible.

Para rematar, quixemos agradecer a Manu Ramil pola súa visita, polos seus consellos e por aportarnos tanto coa súa experiencia. A súa historia e palabras deixaron unha pegada moi forte en todos nós, e estamos desexando seguir os seus consellos e traballar polos nosos soños.

VII EDICIÓN DO CONCURSO DE PORTADA DE LIBROS

 

DÍA DAS LETRAS GALEGAS 2025. AS CANTAREIRAS E A POESÍA POPULAR ORAL

👉A Real Academia Galega acordou dedicar o Día das Letras Galegas 2025 á poesía popular oral, personificado en Adolfina e Rosa Casás Rama, de Cerceda, Eva Castiñeira Santos, de Muxía, e Manuela Lema, Teresa García Prieto e Prudencia e Asunción Garrido Ameixenda, integrantes estas catro das Pandeireteiras de Mens (Malpica). É unha representación colectiva coa que se quere recoñecer a importancia da poesía popular oral, que acompaña a nosa sociedade desde sempre. 

👉O equipo de docentes do Seminario Galán comparte con toda a comunidade educativa os seus agardados materiais das Letras Galegas 2025, como xa apuntamos, dedicados ás cantareiras e á poesía popular de tradición oral.

👉 Ademais dos recursos habituais (unidades didácticas, cartelaría, dípticos, marcapáxinas, escolmas de textos, cuestionarios...), inclúense documentos audiovisuais, retos de robótica, lupa máxica, xogos interactivos etc. adaptados a todos os niveis. Entre outras novidades, atoparedes tamén portadas e compilacións de cancioneiros que poden resultar moi útiles para empregar nas aulas.

No seguinte enlace podedes acceder a eles.

                           👉http://seminariogalan.org/inicio/2025/actividades

 A continuación deixámosvos a foliada que imos cantar e bailar no acto do Día das Letras Galegas que celebraremos o xoves 15 de maio as 13.30 horas na pista do colexio.

Ide ensaiando porque o bailaremos TODOS/AS xuntos ese día!!

LETRA

Miña naiciña, miña nai é beiladora

Non hai outra no lughar-e,

 tamén era a miña avoa, coñecida no beilar-e.

 

Miña nai do corazón-e

Aprendeume a punteada

Despois de pedirlle un ano, para ir á foliada

Ai lalela, ai lalela, ai lalela lela lela

 

Miña naiciña, meu corazón

Vente comigo a bailar ao salón

Ao salón si, ao salón non

Miña naiciña do meu corazón

 

Miña nai tirou un punto,

 na foliada do patrón-e

Inda hoxe andan os guapos

A buscarlle explicación-e

Ai lalela, ai lalela, ai lalela lela lela

 

Miña naiciña, meu corazón

Vente comigo a bailar ao salón

Ao salón si, ao salón non

Miña naiciña do meu corazón

 

Miña naiciña, meu corazón

Vente comigo a bailar ao salón

Ao salón si, ao salón non

Miña naiciña do meu corazón

 

 

Miña naiciña, meu corazón

Vente comigo a bailar ao salón

Ao salón si, ao salón non

Miña naiciña do meu corazón

 

Miña nai, miña naiciña...

SE CANTO É PORQUE QUERO

A Real Academia Galega (RAG) difunde a súa produción da miniserie documental das Letras Galegas 2025 Se canto é porque quero. Xa pode verse en academia.gal e na canle de Youtube institucional. A proposta audiovisual dedicada ás cantareiras e á poesía popular oral destaca a riqueza dun tesouro cultural creado colectivamente polo pobo, especialmente por mulleres como as sete nas que a RAG personifica a celebración do vindeiro 17 de maio, e partindo do pasado reivindica o futuro dunha tradición chea de vida que están a reinterpretar as novas xeracións. 

A RAG irá publicando nas vindeiras semanas máis contidos divulgativos arredor do Día das Letras Galegas na sección da súa web centrada na gran festa da cultura galega (https://academia.gal/letras-galegas/2025/cantareiras). Incorporará tamén novas actividades interactivas á web de Primavera das Letras.

ENTREGA DE PREMIOS DO V CONCURSO DE ESCRITURA CREATIVA DE MICRORRELATOS

 🔷 O salón de actos da Alianza Aresana acolleu este mércores, 30 de abril,  a entrega de galardóns pola quinta edición do Concurso de Escritura Creativa de Microrrelatos, unha iniciativa orientada a promover a escrita entre a nosa rapazada 📝.

🔷 Tras as deliberacións e posta en común das súas perspectivas, despois de ler os 81 textos presentados entre as dúas modalidades de Primaria e ESO, o xurado decidiu outorgar os primeiros premios a André Benito Martínez (Primaria), co microrrelato ‘A Carballeira’, unha historia cun marcado carácter medioambiental, e a Paula Hermida Pena (Secundaria) por ‘A resposta perdida’, facendo fincapé no seu estilo lírico. Ambos recibiron unha tablet/ebook acompañando ao galardón.

🔷 Xunto con eles, o xurado tamén designou aos finalistas de cada categoría, recibindo neste caso un lote de libros como premio do certame literario. ‘Os nenos muiñeira’, de Luca Endres Calvo (Primaria), e ‘Aquel paxaro que non voa ben’, de Adrián Vidal Díaz (Secundaria) obtiveron así o recoñecemento nesta quinta edición.

🔷 No acto de presentación, Alma Barrón 👤, concelleira de Cultura, trasladou os seus parabéns ós rapaces e rapazas -algúns deles representados polos seus familiares nesta entrega de premios- e tamén resaltou a relevancia de incentivar a expresión artística a través da escritura na comunidade educativa de Ares, o principal obxectivo deste certame. 

🔷 O xurado estivo composto por Rocío Pena, Marina González e Yolanda Castro, por parte do colexio aresán, e o xornalista e escritor Pablo J. Rañales, tomando como criterios de selección dos textos a orixinalidade das temáticas, a claridade expresiva, os trazos estilísticos na escrita ou a solidez da estrutura,

👏 👏 Parabéns, e a continuar escribindo! ✍️

XV CARREIRA SOLIDARIA DO NOSO COLEXIO: UN DÍA DE LUZ E ESPERANZA

 Nun día soleado, no que o tempo nos acompañou, o noso colexio celebrou a XV Carreira Quilómetros de Solidariedade, consolidándose como Centro Embaixador de Save The Children por décimo quinto ano consecutivo. Coma sempre, foi unha xornada chea de ilusión, esforzo e solidariedade.

Calzar as nosas zapatillas e correr por unha causa solidaria é unha experiencia que merece a pena, xa que moitos nenos e nenas en lugares pequenos, facendo cousas pequenas, poden cambiar a vida das máis vulnerables. O alumnado de infantil e primaria realizará a carreira no mes de xuño, como remate do curso, xa que os estudantes de ESO estarán nese mes inmersos nos exames finais.

Todo o recadado nesta iniciativa será enviado á ONG Save The Children, da que somos centro Embaixador desde hai 15 anos.

 Queremos agradecer a participación de todo o alumnado e profesorado, así como ás familias que patrocinaron a carreira coas súas doazóns. Tamén agradecemos ao concello, á policía local de Ares e a protección civil a súa colaboración e apoio.

Esta carreira é unha mostra do noso compromiso coas causas solidarias e unha oportunidade para ensinar ao noso alumnado o valor de axudar aos demais. Seguiremos traballando xuntos por un mundo máis xusto e solidario.